ਕੈਨੇਡਾ ਨੂੰ 51ਵਾਂ ਰਾਜ ਬਣਾਉਣ ਦੀਆਂ ਧਮਕੀਆਂ ਦੇ ਵਿਚਕਾਰ ਓਟਾਵਾ ਦੇ ਦੌਰੇ ‘ਤੇ ਰਾਜਾ ਚਾਰਲਸ, ਕੈਨੇਡੀਅਨ ਸੰਸਦ ਵਿੱਚ ਦੇਣਗੇ ਇਤਿਹਾਸਕ ਭਾਸ਼ਣ
ਓਟਾਵਾ: ਬ੍ਰਿਟੇਨ ਦੇ ਰਾਜਾ ਚਾਰਲਸ III ਸੋਮਵਾਰ ਨੂੰ ਕੈਨੇਡਾ ਦੀ ਰਾਜਧਾਨੀ ਓਟਾਵਾ ਪਹੁੰਚੇ ਹਨ। ਉਨ੍ਹਾਂ ਦਾ ਦੌਰਾ ਅਜਿਹੇ ਸਮੇਂ ਹੋਇਆ ਹੈ ਜਦੋਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵਾਰ-ਵਾਰ ਕੈਨੇਡਾ ਨੂੰ ਅਮਰੀਕਾ ਨਾਲ ਮਿਲਾਉਣ ਦੀ ਗੱਲ ਕਰ ਰਹੇ ਹਨ। ਇਸ ਦੇ ਜਵਾਬ ਵਿੱਚ, ਕੈਨੇਡੀਅਨ ਪ੍ਰਧਾਨ ਮੰਤਰੀ ਮਾਰਕ ਕਾਰਨੇ ਨੇ ਰਾਜਾ ਚਾਰਲਸ ਨੂੰ ਸੰਸਦ ਦੇ ਨਵੇਂ ਸੈਸ਼ਨ ਵਿੱਚ ਤਖਤ ਤੋਂ ਭਾਸ਼ਣ ਦੇਣ ਲਈ ਸੱਦਾ ਦਿੱਤਾ ਹੈ।
ਦੱਸ ਦਈਏ ਕਿ ਸਪੀਚ ਫਰਾਮ ਦ ਥਰੋਨ ਉਹ ਭਾਸ਼ਣ ਹੈ ਜਿਸ ਵਿੱਚ ਸਰਕਾਰ ਜਨਤਾ ਦੇ ਸਾਹਮਣੇ ਆਪਣਾ ਏਜੰਡਾ ਪੇਸ਼ ਕਰਦੀ ਹੈ। ਆਮ ਤੌਰ ‘ਤੇ ਇਹ ਭਾਸ਼ਣ ਗਵਰਨਰ ਜਨਰਲ ਦੁਆਰਾ ਦਿੱਤਾ ਜਾਂਦਾ ਹੈ, ਪਰ ਕਈ ਵਾਰ ਸਮਰਾਟ ਖੁਦ ਵੀ ਇਹ ਭਾਸ਼ਣ ਦਿੰਦਾ ਹੈ।ਰਾਜਾ ਚਾਰਲਸ ਦੀ ਮਾਂ, ਮਹਾਰਾਣੀ ਐਲਿਜ਼ਾਬੈਥ II ਨੇ ਆਪਣੇ 70 ਸਾਲਾਂ ਦੇ ਰਾਜ ਦੌਰਾਨ ਸਿਰਫ਼ ਦੋ ਵਾਰ ਅਜਿਹਾ ਕੀਤਾ ਸੀ।
ਓਟਾਵਾ ਪਹੁੰਚਣ ‘ਤੇ, ਰਾਜਾ ਚਾਰਲਸ ਅਤੇ ਰਾਣੀ ਕੈਮਿਲਾ ਦਾ ਸਵਾਗਤ ਗਵਰਨਰ ਜਨਰਲ ਮੈਰੀ ਸਾਈਮਨ, ਪ੍ਰਧਾਨ ਮੰਤਰੀ ਕਾਰਨੇ ਅਤੇ ਰਾਇਲ ਕੈਨੇਡੀਅਨ ਡਰੈਗਨਜ਼ ਦੇ 25 ਸੈਨਿਕਾਂ ਦੇ ਇੱਕ ਆਨਰ ਗਾਰਡ ਦੁਆਰਾ ਕੀਤਾ ਗਿਆ। ਕਿੰਗ ਚਾਰਲਸ ਇਸ ਫੌਜੀ ਰੈਜੀਮੈਂਟ ਦੇ ਕਰਨਲ-ਇਨ-ਚੀਫ਼ ਵੀ ਹਨ। ਇਸ ਮੌਕੇ ਗਵਰਨਰ ਜਨਰਲ ਮੈਰੀ ਸਾਈਮਨ ਨੇ ਕਿਹਾ ਕਿ ਰਾਜਾ ਦਾ ਇਹ ਦੌਰਾ ਸਾਨੂੰ ਯਾਦ ਦਿਵਾਉਂਦਾ ਹੈ ਕਿ ਅਸੀਂ ਕੌਣ ਹਾਂ ਅਤੇ ਸਾਡੀ ਵੱਖਰੀ ਰਾਸ਼ਟਰੀ ਪਛਾਣ ਕੀ ਹੈ।
ਕੈਨੇਡੀਅਨ ਆਮ ਤੌਰ ‘ਤੇ ਰਾਜਸ਼ਾਹੀ ਬਾਰੇ ਬਹੁਤੇ ਭਾਵੁਕ ਨਹੀਂ ਹੁੰਦੇ, ਪਰ ਪ੍ਰਧਾਨ ਮੰਤਰੀ ਕਾਰਨੇ ਅਮਰੀਕਾ ਤੋਂ ਇਸ ਅੰਤਰ ਨੂੰ ਦਰਸਾਉਣ ਲਈ ਸਰਗਰਮ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਕਿੰਗ ਦਾ ਦੌਰਾ ਕੈਨੇਡਾ ਦੀ ਆਜ਼ਾਦੀ ਅਤੇ ਪ੍ਰਭੂਸੱਤਾ ਨੂੰ ਸਪੱਸ਼ਟ ਤੌਰ ‘ਤੇ ਦਰਸਾਉਂਦਾ ਹੈ।
